0001 - Pri ReFantazio...

Surprizas min, ke la teamo de Libera Folio ankoraŭ ne —almenaŭ ĝis nun— verkis artikolon pri unu el la plej popularaj aferoj rilate al Esperanto lastatempe.

Kompreneble, menciita kaj laŭdita estis la kvanto da vidoj de la filmo «Mezuro» - unu el la filmoj de la 6-a Usona Bona Film-festivalo en JuTubo. Je la tempo kiam mi skribas, ĝi atingis nekredeblan 59-mil da vidoj dum nur 9 tagoj. Neimageble! (Fakte, dum la —mi konfesas, malrapida— verkado de ĉi tiu blogaĵo, ĝi saltis de 57-mil ĝis 59-mil!)

Sed kio staras malantaŭ tiu impona kvanto? 59-mil da vidoj —dek-miloj da vidoj pli ol la aliaj filmoj en ka konkurso— sed nur 390 da 'ŝatoj'? Kaj nur 590 spektoj de la filmeto en kiu estas anoncitaj la rezultoj de la konkurso? Kaj, kiel mi jam rimarkis, pli kaj pli da homoj ŝajne ankoraŭ vidas ĝin, eĉ post la fino de la konkurso.

Sendube ne temas pri veraj Esperantistoj kiuj serĉas la filmon kaj spektas ĝin specife por subteni la konkurson, ĉu ne?

Do kio okazis? Kial Film-Festivalo Esperanta subite ŝajne interesis tiom da homoj? Kial la Algoritmaj Dioj de JuTubo tiel benis unu filmon el 26?

Por mi, la plej probabla kialo estas la intereso pri al la lastatempe eldonita videoludo 'Metaphor: ReFantazio' - ĉefe pro ĝia sontrako.

Eldonita en Oktobro 2024, ĝi estas rolludo fantazia, en kiu la ludanto spertas aventurojn, renkontas interesajn rolulojn, batalas malamikojn, ktp. Kaj estas dum tiuj bataloj, pro kialoj kiujn mi ankoraŭ ne tute komprenas, aperas kanto Esperantlingva!

Nekredeble, ĉu ne?

Nu, fakte, jes. Tute nekredeble - aparte kiam oni aŭskultas ĝin...

Ŝajne, la kanto enhavas kelkajn Esperanto-devenajn vortojn, kiujn kantas —aŭ, pli precize, ĉantas— budhana monaĥo.

La videoludo mem estas sufiĉe populara. Miliono da ekzempleroj estis vendata la unuan tagon ĝi estis aĉetebla. Kaj la recenzoj taksas ĝin tre alte (mi ĵus serĉis per Guglo): Steam 9/10; IGN 9/10; GameSpot 10/10; Metacritic 94%.

Unu afero, kiun la ludantaro rimarkas ofte, estas la batalkanto, tiu kun la monaĥo. Se oni serĉas 'Esperanto' en sociaj retejo kiel X (antaŭe nomata Tvitero) aŭ la nove populara Bluĉielo (Bluesky), granda kvanto da rezultoj temas pri la videoludo —kiel bona la kanto estas, kiel aŭskultinda, kto.— kelkaj el ili eĉ mencias eklernadon de Esperanto pro ĝi.

La populareco de tiu videoludo, miaopinie, estas la kialo por la neantaŭvidita kvanto da vidoj por «Mezuro» en la konkurso — tio estas, multaj homoj serĉas 'Esperanto' en JuTubo por trovi la kanton aŭ filmojn pri la videoludo, kaj JuTubo ligis ĝin algoritme al tiaj serĉoj.

Kiu estas mirinde bonŝanca afero. Pro la videoludo, multe da junuloj (ĉar plejparte estas tiuj, kiuj ludas videoludojn) malkovris Esperanton. Kaj pro la konkurso (kaj iom da bonŝanco de la Algoritmaj Dioj) multaj el ili malkovris, ke Esperanto temas pri pli ol nura kanto en videoludo.

Do, ĉu la kanto estas bona? Jes, sufiĉe, se tiaj aferoj plaĉas al vi. Ĉu ĝi estas bona Esperantlingve? Ne! Pro la stilo de la kantado —ĉantado— mi ne povas esti certa, ĉu la monaĥo elparolas verajn vortojn el iu ajn lingvo aŭ ne! Denove, iu uzas Esperanton en ne tre lerta maniero, kiel ilon por iel misterigi aŭ strangigi sian entreprenon. 

(Aŭskultu kaj decidu ĉu ĝi estas bona —aŭ eĉ komprenebla— por vi mem!)

Sed, ne gravas . Estas amuze vidi Esperanton en la sovaĝejo, kaj espereble unu-du novajn Esperantistojn la afero naskos. Ĉu ni vere rajtas postuli pli ol tio?

Do. Populara videoludo? Kun Esperanto? Tio memorigas min pri 'The Expression Amrilato' kiu aperis antaŭ kelkaj jaroj, kaj pri kiu Esperantujo entuziasme parolis. Kaj pri kiu Libera Folio artikolon verkis. Kial do ne aperis ion pri ĉi tiu nova videoludo?

(Vi imagis, ke mi forgesis pri la malfermo de mia blogaĵo, ĉu ne?)

Mi ne plendas pri la manko. Ne estas devo por Libera Folio verki artikolojn pri ĉio sub la suno, ĉu ne?

Mi nur rimarkis la aferon, kaj verkis blogaĵon de nenia konsekvenco — ĉefe por ekzerci min pri ĝenerala verkado, kaj parte por amuzi min mem.

Kiel ĉiam, pardonu miajn erarojn, kaj fartu bone.

Ĝis!